Kom á Kveik Ung verkstovu!

ABC átakið “Kveik Ung”, ið er partur av verkætlanini ABC fyri sálarliga heilsu, er eitt nýtt átak fyri ung millum 16-25 ár, ið bjóðar ungum møguleika fyri at hugbinda seg í ABC boðskapunum um góða sálarliga heilsu, og førleikamenna seg til at stuðla og eggja javnaldrum til at hugbinda seg í sálarliga góðum virksemi. Átakið er eisini fyri tey, ið hava samband ella arbeiða við ungum og áhuga fyri sálarligari heilsu millum ung.

Í sambandi við nýggja átakið fáa vit vitjan úr Avstralia av stigtakaranum, Darci Miller, ið saman við Fólkaheilsuráðnum stendur fyri verkstovunum í august 2019, ið verða tær fyrstu uttanfyri Avstralia.

Endamálið við átakinum er at:

·         Økja um tilvitið um og eggja ungum til at tilogna sær atferð, ið er góð fyri sálarligu heilsuna

·         Økja um mótstøðuføri hjá ungum millum 16-25 ár

·         Økja um tilvitið um at sálarlig heilsa eisini fevnir um trivnað, avstigmatisering av sálarligum avbjóðingum og eggja til atferð, har ein søkir sær hjálp

·         Økja um luttøkuna í sálarliga heilsufremjandi virksemi

·         Økja um tilvitið hjá teimum, ið hava samband við ung, um hvussu tey kunnu stuðla ungum í sálarliga heilsufremjandi atferð 


“Vit vita at ung hava lyndi til at venda sær til vinir fyri at fáa stuðul, tá ymiskt ikki gongur so gott, og er hetta orsøkin til, at tað hevur týdning at vit læra ung at stuðla hvørjum øðrum og eggja hvørjum øðrum til at gera ymiskt, ið er gott fyri sálarligu heilsuna” sigur Darci Miller. 

 “Endamálið við átakinum ‘Kveik ung’ er at ung, ið velja at gerast Ungdóms Kveikjari verða ein kelda í nærumhvørvinum, ið hava kunning um hvussu javnaldrar kunnu vera uppií virksemi, ið vit vita er gott fyri sálarligu heilsuna sum t.d. ítrótti, list og sjálvbodnum arbeiðið” sigur Miller. 


Kveik Ung hevur tvær verkstovur

Ein verkstova er fyri ung millum 16-25 ár og er ein stuttlig verkstova, ið snýr seg um at læra tey ungu, hvussu tey kunnu ansa eftir og betra um sína sálarligu heilsu og sálarligu heilsuna hjá sínum vinum og øðrum javnaldrum.

Harafturat hava vit eina verkstovu fyri t.d. lærarar, venjarar, ungdómsráðgevar, foreldur og onnur, ið hava áhuga fyri at stuðla Ungdóms Kveikjarum og eggja øðrum ungum at gerast meira virkin í sálarliga heilsufremjandi virksemi.

Tíð og stað fyri verkstovurnar

 “Kveik Ung – Ungdóms Kveikjari”: er fyri ung millum 16-25 ár og verður 14. august 2019 kl.16.00-18.00, Sjóvinnuhúsið, Vestara Bryggja 15, 100 Tórshavn.

“Kveik Ung – Stuðla ungum”: er fyri fólk, ið hava samband við ung og áhuga fyri at stuðla ungum (lærarar, venjarar, ungdómsráðgevar, foreldur, politi o.s.fr.) og verður 15. august 2019 kl.16.00-18.00, Sjóvinnuhúsið, Vestara Bryggja 15, 100 Tórshavn.

Tilmelding og fyrispurningar

Tað er ókeypis at luttaka á verkstovunum og tær eru í fyrstu syftu á enskum. Hevur tú hug at melda teg til verkstovuna, skriva so til: Monika@folkaheilsa.fo og upplýs: navn, aldur, telefonnummar og verkstovuna tú vilt melda teg til.

Hevur tú spurningar, ert tú vælkomin at ringja til Moniku Mohr, verkætlanarleiðara fyri ABC fyri sálarliga heilsu í Fólkaheilsuráðnum á tlf.: 515157.

Tilfar

Fyri meira kunning um átakið, sí tilfarið niðanfyri. 

 

Kunning um átakið Ungdóms Kveikjari.pdf  

Kveik Ung - Ungdóms Kveikjari.plakat.pdf  

Kveik Ung - Stuðla ungum.plakat.pdf